Монгол Улсын гавьяат жүжигчин Чүлтэмийн Алтан-Өлзий өвчний улмаас таалал төгсчээ.
Тэрбээр 1950 онд Завхан аймаг Түдэвтэй сум баянцагаан баг Улаан үзүүр гэдэг газар төрсөн. 1973 оноос Монгол улсын тайз, дэлгэцийн урлагт өөрийн хувь нэмрээ оруулан УДЭТ-т жүжигчнээр ажиллаж эхэлсэн. Түүнийг үндэсний болон сонгодог жүжигт, эмгэнэлт ба инээдмийн аль ч дүрд тоглох чадвартай, арга туршлагатай жүжигчин. Мөн тоглолтын хэв маяг нь үнэн, энгийн байдлыг эрхэмлэж, сэтгэлийн үйлдлийг тууштай баримталдагт оршино хэмээн түүний ур чадварыг мэргэжил нэгт нөхөд нь үнэлдэг байв.
Тэрбээр “Өнөр бүл” киноны Гажиг Гармаа, “Үүрийн цолмон” киноны Баян Нямбуу, “Эргэж бодох бодол”, “Зарлаагүй дайн” зэрэг 60 гаруй уран сайхны кино, 120 гаруй драмын жүжигт дүрээ мөнхөлсөн.
Түүний Монгол улсын тайз, дэлгэцийн урлагт оруулсан хувь нэмрийг нь үнэлж, Монгол Улсын Засгийн газрийн шийдвэрээр 2002 онд МУГЖ цол хүртээсэн билээ.
Ум сайн амгалан болох болтугай.
