АНУ-д гэр бүлээрээ ажиллаад нэлээд хугацааг үдсэн Монгол Улсын гавьяат жүжигчин Н.Батцэцэг эх орондоо ирээд хоёр сар болж буй. Тэрбээр өнгөрсөн хугацаанд эх орон, монгол түмнээ үнэхээр их санасан бололтой. Олон жил хилийн чанадад амьдарсан болоод ч тэр үү, түүнд юм бүхэн шинэ мэт санагдаж байгаа бололтой. Жүжигчин бүсгүй наадмын үеэр анх удаа Улсын баяр үзэж байгаа мэт догдолсон харагдсан.
Тэрбээр энэ үеэр “Хүмүүс наадмын нээлт, хаалтыг Цэнгэлдэх хүрээлэндээ үзээд, бусад үед нь Тэрэлж, Гачуурт руу гарч, гол даган амардаг болсон байна. Өнгө өнгийн асрууд цэцэг шиг алаглаад л, галаараа буусан уяачдын гэрээс инээд хөөр цангинаад л. Монгол ахуйгаа хараад сууж байхад үнэхээр жаргалтай, дотно сайхан санагдлаа.
Монголчууд маань бусдыг хүндэтгэж, орчноо бохирдуулахгүйг хичээн уут саванд хогоо хийж сурсан байна шүү. Бас тусгай дохиолол бүхий машин явж, голын эргээр буусан наадамчдад үер уснаас сэргийлж, болгоомжтой байхыг сануулан эргэж тойрч байна. Сайхан наадлаа. Та бүхэндээ маш их баярлалаа” хэмээн ярьсан юм.
Гавьяат маань ийнхүү монгол түмнийхээ дунд сэтгэлээ сэргээж, эх орон, элгэн түмнээ санасан санаагаа тайлтал нааджээ.
