“Гурван охин” нэрээ солих талаар ярилцсан бөгөөд залууст “Гурван хүүхэн” гэж шоолуулаад тайван ч дуулж чадахаа больсон гэх. Мэдээж хэрэг, тэдэнд “Гурван үрэл”, “Гурван алим” гэсэн нэр ч зохихгүй гэдэг нь тодорхой. Тиймээс монгол нэр өгөх үү, эсвэл гадаад нэр сонгох уу гэсэн томоохон асуулт тулгарчээ. Үүний зэрэгцээ, Г.Анхмаа ээж болсон учраас энд тэндхийн нэвтрүүлэгт уригдахдаа “Найз залуу байхгүй. Гэр бүлийн амьдралаа төлөвлөөгүй” гэсэн гэнэн үг унагахгүй байхаар шийдсэн юм байх. Ганц бие, залуухан, царайлаг, дэгжин, бас авьяастай гэх тодотгол нь эмэгтэй хамтлаг, дуучдын хувьд эрэгтэй голдуу фэнүүдийнхээ хүрээг тэлэх алтан боломж.
Гэвч гучин насны босго шүргэж, эхнээсээ нөхөрт гарч байгаа тэдэнд өөр сонголт алга юм чинь одоо яая гэхэв. Тэртээ тэргүй, болсон болоогүй дуу дуулаад хагас нүцгэлээд эхэлсэн нялх охидын дэргэд тэд яах аргагүй эгчмэд харагдана.
Энэ бүхэнтэй санал нийлсэн хамтлагийн ахлагч Д.Ану саяхан нэгэн нэвтрүүлэгт орохдоо ийн ярьсан юм. “Гуч хүрээд ч тэр үү, аливаа зүйлд илүү бодлоготой ханддаг болсон. Тиймээс хэн бүхний хэл амны бай болж, элдэв ярианы сэдэв болохоос зайлсхийдэг. Би зүгээр л өөрийнхөөрөө амьдармаар байна. Гэр бүл, хайр дурлалын хувьд ч тэр. Ойрын хугацаанд манай хамтлаг шинэ цомог гаргах, нэрээ солих тал дээр олон зүйлийг шийднэ. Гишүүдийн амьдралын хэв маяг болоод уран бүтээлийн шаардлагаас болоод иймэрхүү өөрчлөлт хийж байгаа юм” гэсэн дуучин бүсгүй ч продюссер Д.Болдын тусламжтайгаар ээлжит тэсрэлт хийхээ амласан юм.
www.urlag.mn Ayu
