Дэлхийг тойрон аялан тоглож буй Мадонна санаанд багтамгүйгээр “сахилгагүйтэж”, байгаа талаар олон улсын хэвлэл мэдээллээр шуугиж байна. Тэрбээр Парисын цэнгэлдэх хүрээлэнд болсон тоглолтын үеэр тайзан дээр эрээ цээргүй аашилж, яг л биеэ үнэлэгч шиг байсан нь францчуудад таалагдаагүй учраас олон үзэгч тасалбараа буцааж, мөнгөө авахыг хүсчээ.
“Je t'aime” буюу “Би чамд хайртай” дуугаа дуулж байхдаа 53 настай поп хатагтай өгзөг дээрээ эргэлдэнгээ хөлөө савчиж байдаг “нууцаа” дэлгэж, төгсгөл хэсэгт нь хамтран дуулсан залууг буудаж “алсан” нь хүмүүсийг ихээр бухимдуулж, “Янхан тайзнаас буу” гэсэн хатуухан үг сонсоход хүргэсэн гэнэ. Тасалбарын үнийг буцааж өгөхийг шаардсан хүмүүс “Тоглолт ердөө 45 минут үргэлжилсэн. Үүнээс 15 минут буюу гуравны нэг хэсэгт нь Мадонна улс төрийн тухай чалчиж байсан. Удаан хүлээсэн тоглолт иймэрхүү чанартай байхад бид яаж сэтгэл хангалуун үлдэх юм бэ.
Бид урлагийн тоглолт үзэхийг хүссэн болохоос хөгшин янхны хөгийн үзүүлбэр харах гэж ирээгүй. Тоглолтын тасалбарыг урьдчилан борлуулалгүй, цагийг нь тулган хүмүүсийг “дайтуулсан”. Ийм балиар зүйл үзэхээ мэдсэн бол хүмүүс боломжийн байрлалтай тасалбарын төлөө үхэн хатан шахалдаж, түлхэлдэхгүй байсан” хэмээн гомдолжээ. Эл тоглолтын тасалбарыг 280 еврогоор борлуулсан юм байна.
Ж.ЭРДЭНЭ
