Хошин урлагийн “акул”-ууд “Маск” продакшныг голж байжээ

Монголын хошин урлаг гэх том айлд данстай болсон “Маск” продакшн зургаан нас хүрлээ. Өнгөрсөн зургаан жилийн хугацаанд тус хамтлаг үзэгчдийг байлдан дагуулж, хошин урлагийн “акул”-уудын тоонд зүй ёсоор орох болсон. “Маск”-ынхан энэ намар үзэгч фэнүүддээ зориулж нэлээд олон сюрприз барихаар төлөвлөсөн гэнэ. хамтлагийн үүсгэн байгуулагч жүжигчин П.Эрдэнэзээн, С.Мөнхсайхан, М.Баярмагнай нар өмнө “Өнгөт инээд” хамтлагт хүчин зүтгэдэг байсан бөгөөд 2007 оны 8 сард өрх тусгаарлаж “Маск” продакшныг байгуулсан түүхтэй. Шинэ ажил эхлэх тийм ч амар байдаггүй учир “Маск” продакшн ч анх байгуулагдахдаа нэлээд олон саад бэрхшээлийг давсан гэдэг. Үүсгэн байгуулагч гурав маань “Өнгөт инээд” хамтлагаас гармагцаа шинэ байгуулах хамтлагтаа ямар нэр өгөх, ямар, ямар жүжигчин авах талаар багагүй толгой гашилгасан бөгөөд намрын нэгэн налгар өдөр Туул голын эрэг дээр хонины толгой хувааж идэнгээ “Маск” гэдэг нэрийг бодож олжээ. Үүний дараа тоочиглосон жүжигчдэдээ хамтрах санал тавьсан боловч шинэ байгуулагдаж байгаа хамтлагийг хошин урлагийн акулууд голж байсан аж. Тиймээс дан шинэ, залуу уран бүтээлчдээр хамтлагаа бүрдүүлэхээр шийдсэн гэдэг. Өдгөө тус хамтлаг үзэгчдийн санал асуулгаар хошин урлагийн продакшнууд дундаа нэлээд дээгүүрт бичигдэх амжилтын эзэд болсон юм.
Г.Мөрөн