Монголын хошин урлаг, кино урлагт багагүй амжилт олоод буй “TV cocktail” хамтлагийнхан ирэх сард Францын зохиолч Шмитийн 1999 онд бичсэн зохиолоос үндэслэн драмын анхны жүжгээ амилуулах гэж байна.
Тус хамтлагийнхан өнгөрсөн хугацаанд телевизийн олон арван зохиомж болон гурван кино бүтээсэн юм.
“TV cocktail”-ын гишүүн Э.Цолмонбаярын ярьснаар жүжгийн гол дүрд Н.Цэнд-Аюуш, А.Өнөржаргал болон Д.Энхбаяр тоглох аж. Мөн хэсэг хугацаанд тайзны урлагаас хол байсан хошин урлагийн шинэ үеийн төлөөллийн нэг Амбий буюу Ц.Батхуяг тоглох юм.
Жүжгийн найруулагчаар Ж.Сэнгэдорж ажиллана. Түүний найруулсан “Бодлын хулгайч” кино “Улаанбаатар кино их наадам”-аас таван номинациар гран-при хүртсэн билээ.
Э.Цолмонбаярын ярьснаар тэдний анхны тайзны жүжиг амьдралын утга учрыг харуулна. Инээд хөөр, баяр гуниг гээд хүмүүсийн амьдралд тохиолддог үйл явдлуудаас гадна ухаарал, амьдрах урам итгэлийг үзэгчдэд өгөх аж. “TV cocktail” хамтлагийнхан ирэх сарын 8 юм уу, 10-нд нээлтээ хийх жүжгээ залуучуудыг түлхүү үзээсэй гэж хүсэж байгаа юм.
“TV cocktail” хамтлагийнхан Монгол Улсад суугаа Францын Элчин сайдын яаманд хандан тус улсын жүжгийг тайзнаа амилуулах эрх авсан аж. Тиймдээ ч зохиогчийн эрхийг зөрчихгүй гэдгийг Э.Цолмонбаяр онцлов.
Д.Түвшинтөр
