Автомашинуудыг улсын дугаарын цифрээр нь ялгаварлан замын хөдөлгөөнд оролцуулах захирамжийг Нийслэлийн иргэдийн төлөөлөгчдийн хурлаас гаргасан. Энэ захирамжийн дагуу иргэд ажлын таван өдрийн ердөө ганц хоногт нь л машинаа унахгүй байх ёстой. Гэвч зарим иргэдэд энэ ганц хоногийн явган алхалт байж боломгүй зүйл мэт санагдаж байгаа бололтой. Твиттерийн хэрэглэгчид дугаараа сольж буй олон зургийг “жиргэж” заримыг нь бүр Замын цагдаагийнхан барьж, хариуцлага хүлээлгэсэн ч удаатай. Тэгвэл энэ удаа гавъяат жүжигчин Аглуугийн нэгэн автомашины дугаарыг сольж байгаа зураг твиттер, фэйсбүүкээр цацагдаж интернэтэд багагүй шуугиан тариад байна.
Бид энэ талаар МУГЖ Л.Баттулга түүнтэй холбогдож лавласан юм.
-Таны 60-89 улсын дугаартай, Harrier маркийн автомашины дугаарыг сольж байгаа зураг твиттер, фэйсбүүкээр цацагдаад байна. Та үнэхээр хууль зөрчиж, автомашиныхаа дугаарыг сольж хөдөлгөөнд оролцоод байгаа юм уу?
-Юун зураг вэ. Наадах чинь манай эхнэрийн эгчийн автомашин байна. Баянхонгороос ирээд машиндаа дугаар авсан юм. Тэрийг нь би боож өгсөн. Би өөрөө 62-62 дугаартай ланд унадаг хүн шүү дээ. Наад машины чинь эзэн нь Энхтөр гээд хүн байгаа.
-Та 62-62 гээд хоёроор төгссөн дугаарлалттай өдөр буюу мягмар гарагт хөдөлгөөнд оролцдог уу?
-Яалаа гэж дээ.
-Тэгвэл та ажлаа яаж амжуулдаг вэ?
-Такси бариад л. Соёлын төв хүртэл 1500 төгрөг гардаг юм.
Тэрээр ийнхүү ярьлаа. “Таны зураг, утасны дугаар гээд бүгд л твиттерт цацагдаж байна даа” гэхэд тэрээр “од болчих юм байна л даа. Үнэнийг нь сайн бичээрэй” хэмээн захилаа. Юутай ч гавъяат хууль зөрчдөггүй ажээ.
М.Жаргал
Эх сурвалж gogo.mn
