Монголын рок поп урлагийн загалмайлсан эцэг хэмээгддэг Монгол Улсын Урлагийн Гавьяат зүтгэлтэн, Монголын Хөгжмийн Зохиолчдын холбооны шагналт, “Пентатоник” наадмын 5 удаагийн шагналт хөгжмийн зохиолч Л.Балхжавын “Миний дуунууд” уран бүтээлийн тайлан тоглолт энэ жил 14 дэх удаагаа болох гэж байна.
Энэ жилийн “Миний дуунууд” тоглолтонд Төрийн соёрхолт дуучин Д.Болд, МУГЖ дуучин Т.Ариунаа, Б.Сарантуяа, “Харанга” хамтлагийн дуучин Х.Лхагвасүрэн, хөгжмийн зохиолч, төгөлдөр хуурч Б.Чинбат, “Sweetymotion, “Мотив”, “Гурван охин” хамтлаг, ОХУ-ын Буриад улсын ардын жүжигчин Б.Амархүү, “Universe Best Songs” наадмаар овоглодог дуучин Б.Жавхлантөгс, П.Өнөржаргал, А.Жагар, Э.Төгсбаяр, Э.Соёмбо, Э.Мишээл, Б.Мөнх-Эрдэнэ болон үе үеийн шилдгүүд гээд рок попынхон халуун ам бүлээрээ оролцоно.
Мөн Үндэсний Дуу Бүжгийн Эрдмийн чуулгын найрал хөгжим, Улсын Филармонийн “Морин хуур” чуулга, Хөгжим Бүжгийн Коллежийн Симфони найрал хөгжмийн уран бүтээлчид бүрэн бүрэлдэхүүнээрээ оролцож, жинхэнэ хөгжимлөг үдшийг сонсогчдод бэлэглэх ажээ.
Түүнчлэн хөгжмийн зохиолч Л.Балхжавын жил бүрийн тоглолт нь гүн хүндэтгэл, чинь сэтгэлийн талархал, гэнэтийн бэлгээр дүүрэн болдог уламжлалтай. Тэрээр дуулж, хуурдаж, бөмбөрдөж урлагийн олон гайхалтай авъяас билигээрээ үзэгчиддээ сюрпризийг барьсан хөгжмийн зохиолч маань энэ жил ч мөн адил сонирхолтой бэлэг бэлдсэн нь дамжиггүй.
Ийнхүү “Миний дуунууд-2012” тоглолт энэ сарын 25, 26, 27-ны 19 цагаас “UB palace”-ын концертын их танхимд болно.
Таныг урлагийн тэнгэр ивээх болтугай…
www.urlag.mn Ayu
