Үзэгчдийн хоног тоолон хүлээж буй “Ану хатан” киноны дуу, клиптэй болжээ. Хамгийн олон хит дууны зохиогч, гитарчин Л.Өлзий-Орших үг аяыг нь бичсэн рок баллада төрлийн “Жинхэнэ хайр зүрхэнд үлддэг” дууг “Хурд” хамтлаг дуулжээ. Клипний зураг авалтыг Галдан сэтгэлтэй бүсгүйгээ ах Сэнгэ хунтайждаа алдаад ногоон дарь эх бэлэглэчихээд Цастын орны зүг алсран одож байгааг харуулсан талд хийсэн аж. Ойрын үед шинэ уран бүтээл хийгээгүй “Хурд”-ын ийнхүү “Ану хатан” киноны дуугаар фэнүүдтэйгээ эргэн мэндчилж байна. Сонирхолтой нь хамтлагийн ахлагч Д.Ганбаяр цэрэгт байхдаа “Мандхай цэцэн” киноны олны хэсэгт “тоглож”, овсгоо гарган Мандхай хатан зэрэг гол дүрийнхэнтэй патиараа татуулсан нь тэдний студид өлгөөтэй байдаг гэнэ.
Барагтай кино, жүжгийн дуу дуулдаггүй “Хурд”-ын ахлагч хатны тухай анхны киноны олны хэсэгт тоглосондоо бэлэгшээж, бас нэгэн түүхэн хатны тухай киноны дууг дуулах саналыг дуртайяа хүлээн авчээ. Клипний ивээн тэтгэгчээр тээвэр зуучийн “Landex” ХХК ажилласан байна. “Жинхэнэ хайр зүрхэнд үлддэг” дууны зохиогч Өөжгий клипнийхээ эвлүүлгийн найруулагчаар ажиллажээ. Рок балладаа дуу зохиох мөрөөдлөө ийнхүү биелүүлэхдээ томоохон түүхэн кинонд зориулан бичиж, мэргэжлийн камераар зургийг нь авсандаа Өөжгий их л баяртай байгаа гэнэ.
“Ану хатан” киноны клипийг 24-ний даваа гаригт буюу өнөөдөр “UВS music” телевизээр цацаж эхлэх ажээ.
