Монголын ард түмэн олон зууныг өртөөлсөн үндэсний соёлын гайхамшигт өв сан бүрдүүлсний дотор ном судрыг эрдмийн дээд эрдэнэ хэмээн сүслэн бүтээж, үнэт эдээр баринтаглан өргөө гэрийнхээ хойморт залж, үр удмаараа гэгээрч боловсрон, дээдлэн хадгалж ирсэн эрхэм уламжлалтай билээ. Монголын нууц товчоо бол Монголын их хаадын угсаа гарвал, монголчуудын ахуй амьдрал, үндэсний түүх, хэл бичиг, ардын аман зохиол, бөө мөргөл, зан заншлын их нэвтэрхий толь, монгол хэлний үгийн урлагийн сонгодог бүтээл, нүүдэлчний соёлын үл давтагдах хосгүй шинж чанараараа ижилгүй товойж, үеийн үед гайхагдсаар эрин зууныг эзэлсэн их туульс, тал нутгийн анхилам үнэр нэвт шингэсэн түүх, он цагийн дарааллын бичиг юм.
Иймээс бичиг соёлын түүхэн дурсгал болох Монголын нууц товчоогоор Бичиг соёл төвийн уран бүтээлчид сүүлийн хоёр жилийн хугацаанд Тамгат, Их Монгол, Түүхэн цаг, Хүлэг баатарууд, Шүтээн, Тэнгэрийн Хас нэрт монголын нууц товчоог бүхэлд нь багтаасан зургаан бүтээл туурвилаа. Бүтээл тус бүр өөрийн онцлогтой 5-6мм зайнд, монгол бичгийн хичээнгүй тигээр 140*360см хэмжээтэй 4 бүтээл, 140*480см хэмжээтэй 2 бүтээл туурвилаа. Урьд нь монголын нууц товчооны ийм хэмжээний бүтээлийн үзэсгэлэн гарч байгаагүй юм. Эдгээр бүтээлүүдээс гадна бэхэн зураг, каллиграфийн бүтээлүүдийг энэхүү үзэсгэлэнд толилуулна.
Үзэсгэлэнгийн зорилго:
“Монголын нууц товчоо Монгол бахархал” үзэсгэлэнгээрээ дамжуулан монголын ард түмний гайхамшигт түүхэн бүтээл, Монголын нууц товчоог бага насны хүүхдээс эхлээд өтгөс бууралд хүртэл таниулан сурталчилж, түүх соёл, монгол бичгээрээ бахархаж, суръя, мэдье гэсэн чин хүсэл тэмүүллийг нь төрүүлэхэд бидний үзэсгэлэнгийн зорилго оршино.
Үзэсгэлэн 2013.01.18-25нд буюу өнөөдөр 17:00 цагаас “Уран зургийн галерей”-д нээлтээ хийх ажээ.
Та бүхнийг урлагийн тэнгэр ивээг…
www.URLAG.mn
