Боловсрол, шинжлэх ухааны яам хүүхэд нэг бүрийг орхигдуулалгүй хөгжүүлэх зорилгоор “Авьяас” үндэсний хэмжээний хөтөлбөр хэрэгжүүлж байгаа билээ. Тэрээр хоёр сарын өмнө урлаг, спорт, шинжлэх ухааны салбарт амжилттай ажиллаж яваа 21 хүнийг “Авьяас” хөтөлбөрийн үндэсний сургагч багшаар сонгож ажиллуулах болсноо зарласан юм. Тэдгээрийн нэгээр “Хурд” хамтлагийн гитарчин, продюссер Д.Отгонбаяр сонгогджээ. Хүүхэд нэг бүрийн сонирхол, авьяасыг нь нээж хөгжүүлэх, өөрөө хөгжихөд нь туслах нь сургагч багшийн үүрэг. Отгонбаярын хувьд нийслэлийн 52-р дунд сургуулийн дэргэд амьд хөгжмийн дугуйлан хичээллүүлж эхэлжээ. Хөгжимд сонирхолтой 17 хүүхэд түүний дугуйланд элсэж, гитар, бөмбөр хэрхэн тоглохыг сурч байна. “Авьяас” хөтөлбөр хэрэгжсэнээр эдгээр хүүхдүүд ямар амжилтад хүрсэн бэ гэдгийг ирэх зургадугаар сарын нэгэнд болох фестивалиас харж болох юм. Харин эдгээр хүүхдүүдийг нэгтгэн рок хамтлаг байгуулж, өөрсдийнх нь зохиосон үг, аяаар дуу бүтээж ирэх зургадугаар сарын нэгэнд жинхэнэ бяц авна хэмээн алдарт гитарчин маань амлаж байсан юм.
Дашрамд дуулгахад “Хурд” хамтлагийнхан бүрэн бүрэлдхүүнээрээ Өвөрмонголын “Одон телевиз”-ийн урилгаар сар шинийн нэвтрүүлэгт нь оролцохоор хүлгийн жолоо залсан билээ. Тус нэвтрүүлгийн бичлэг нь Ордосын Бугат хотод өнгөрсөн 22-нд хийгдсэн бөгөөд, Хөх хотод 24,25-нд хийгдэх юм. Жил бүр уламжлал болон зохиогдож ирсэн тус арга хэмжээнд “Хурд” хамтлагийнхан Монголын рок поп урлагийг төлөөлөн оролцож байгаа ажээ.
Та бүхнийг урлагийн тэнгэр ивээг…
www.URLAG.mn
