Тулгар төрийн 2222 жилийн ой, Үндэсний их баяр наадам, Ардын хувьсгалын 92 жилийн ойн баяр наадмын бэлтгэл бүрэн хангагджээ. Тэрээр Хүй долоон худагт Үндэсний их баяр наадмын хурдан морьдын уралдааныг зохион байгуулдаг болсоор найман жил болж байгаа ч наадамчин олны ая тухтай, эрүүл, аюулгүй байдлыг хангасан орчин бүрдэж чадаагүй байсан юм. Наадамчдыг ая тухтай, эрүүл аюулгүй наадамлах нөхцөлийг бүрдүүлэх үүднээс энэ жил 40 гаруй тэрбум төгрөгийн санхүүжилт гарган, Хүй долоон худгийг “Монгол наадам” цогцолбор болгохоор хийж эхэлсэн бөгөөд эхний томоохон бүтээн байгуулалт болох “361”-ийн төмөр замын гармаас Хүй долоон худаг хүртэлх 8.5 километр автозамын ажил бүрэн дуусчээ. Мөн 20 га талбайд 7000 гаруй автоамшины зогсоол шинээр барьж байгуулахаар төлөвснөөс энэ жилдээ 5800 автомашины зогсоолыг барьж дуусган эко хавтангаар зүлэгжүүлсэн байна.
Түүнчлэн 12.5 га талбай газарт наадамчдад зориулсан зорчих хэсэг, худалдаа үйлчилгээ явуулах тойрог хэлбэрийн эко хавтан тавьж, бетондож цутгасан хоёр талбайн ажил бүрэн дууссан байна. Тойргийн голыг зүлэгжүүлж, ардын урлагийн үзүүлбэр, тоглолт хийх бөгөөд урлагийн тоглолтуудын бэлтгэл ажил бүрэн хангагдсан гэж СУИС-ийн захирал Э.Сонинтогос Ерөнхий сайдад танилцууллаа. Морь барьдаг зурваст 3000 үзэгчийн зөөврийн суудал байрлуулжээ. Хуучин хэрэглэж байсан суудлуудтай нийлээд 4000 гаруй үзэгч морь барианы газарт тухлах боломжтой болсон байна. Харин дараа жилээс эхлэн Хүй долоон худгийг “Монгол наадам” цогцолбор болгох ажлын хүрээнд 8000 суудал бүхий саран хэлбэрийн стадион байгуулахаар төлөвлөж байгаа юм.
Жил бүр шүүмжлэл дагуулдаг хог хаягдал болон бие засах газрын асуудлыг энэ удаад бүрэн шийдвэрлэсэн байна. 50 метр тутамд хогийн сав байрлуулах ба дараа нь зөөвөрлөөд авч явах боломжтой, ариун цэврийн шаардлага хангасан бие засах газруудыг байрлуулсан байна. Ийнхүү энэ жилийн наадмаар наадамчин олон маань дэлгэр сайхан наадах нээ.
Та бүхэн сайхан наадаарай…
www.URLAG.mn
