"Blue moon" арт галерейн гишүүн уран бүтээлч, СТА Э.Гансүхийн "УВДИС" бие даасан уран бүтээлийн үзэсгэлэн дэлгэгдэхэд бэлэн боллоо. Тэрээр 2014 онд тус галерейд “Зүүдлэгдээгүй зүүд “ бие даасан үзэсгэлэнгээ олны хүртээл болгосон ба "Blue moon" арт галерейгаас зохион байгуулсан нийт мэргэжлийн уран бүтээлчдийн нэгдсэн үзэсгэлэн бүрийг алгасалгуй идэвхитэй амжилттай оролцсоор ирсэн.
Гансүх зураач (багшийн) –ын оролцсон тэмцээн уралдаан, үзэсгэлэн болон түүний бэлтгэсэн сурагчдын гаргасан амжилтуудийг дурьдвал багагүй цаг зарцуулах нь түүний хэр хөдөлмөрч болоод чадварлагийн нотолгоо биз ээ. Тэрээр 7дахь жилдээ ШҮТИС-д зураг дизайны багшаар ажиллахын зэрэгцээ уран бүтэлээ туурвиж яваа уран бүтээлч юм.
Түүний энэ удаагийн "УВДИС" үзэсгэлэн 21 бүтээлээс бүрдэх ба 21 шинэ санаа, 21 өөр ертөнц, утга агуулага илэрхийлэх болно. 21 гэсэн тоог сонгон авсан нь ч учиртай биз ээ. Эл үзэсгэлэнд орсон бүтээлүүд нэг төрлийн заль. Учир нь хэзээ ч эвлэшгүй агуулга, асар их зөрчилдөөнийг нэгэн цул болгон хөнгөн өнгөөр далдалсан байв. Хувь зураачийн уран бүтээлийн ерөнхий өнгө аяс нь хурц тод өнгө, шүүмжтэй логик үндэслэлээс бүтдэг гэвэл хилсдэхгүй. Гэвч энэ удаад өөрийнхөө мөн чанарыг маш зальжин аргаар илэрхийлсэн болох нь андашгүй.
Энхтайваны Гансүх зураач уг бүтээлүүддээ олон үзэл суртал, үйл явдлыг өөртөө агуулаад зогсоогүй үзэгчдийн сэтгэлгээг хөндсөн. Байж болшгүй төсөөллийн дүрслэлийг бодит нийгмийн асуудлуудтай уялдуулан “наажээ”. Төсөөллийн, зүүдний ч гэмээр эдгээр олон дүр нь дахин задарч хөгжих боломжтой. Өөрөөр хэлбэл үзэгч өөрийн гэсэн дүгнэлт хийн задлаж, сэтгэх орон зайг өгсөн бүтээл ч гэж болно.
Үүний зэрэгцээ Монгол соёл, араншин болон Монгол зөнгөөр бүтээлүүдийнхээ санааг өгүүлэхийг зорьсон бөгөөд дүрс, дүрийн хувьд “Монгол” гэх хайрцганд баригдаагүй нь тодорхой байлаа. Хэрэв уншигч та “Увдис” бүтээлийг нь сайтар ажиглавал миний хэлэхийг оролдсон санааг ойлгох болно.
Бүх урлагийг магтах, шүүмжлэх эрх нь үзэгчдэд байдаг учраас магтаалын үгсээс татгалзлаа. Үзэгч та дүгнэ.
Уг үзэсгэлэн 2016.05.16-25-ны хооронд өдөр бүр 09:00 – 00:00 “Blue moon” арт галерейн үзэсгэлэнгийн танхимд үргэлжлэх бөгөөд дэлгэрэнгүй мэдээллийг 88850812 дугаарын утсаар лавлана уу.
