“Шинэ үе” продакшны чадварлаг жүжигчин СТА Г.Ундармаад авъяас билиг, царай зүс харамгүй заяасан ч тэрээр өдий хүртэл хүүхэд төрүүлээгүйдээ сэтгэл дундуур явдаг нэгэн.
Гэхдээ жүжигчин бүсгүй ирээдүйд бяцхан үрээ тэвэрнэ гэсэн бүрэн дүүрэн итгэлтэй явдаг бөгөөд ажлынхаа хажуугаар хүүхдээ төрүүлж байгаа бүсгүйчүүд, түүний ар гэрийнхэнд аз жаргал бэлэглэх зорилготой “Итгэлийн танхим” нэртэй төслийг санаачлан Нийслэлийн бүх төрөх эмнэлгүүдэд ийм танхим байгуулахаар өнгөрөгч наймдугаар сарын 20-ноос ажилдаа оржээ.
Тэрээр фэйсбүүкийн найзуудаасаа энэ талаарх саналаа цуглуулсан бөгөөд өөрөө ч хангалттай судалгаа хийсний үндсэн дээр нийгэмд хариуцлагыг мэдрүүлэхээр ийнхүү томоохон групп компаниуд, тэр ч бүү хэл төр, засгийн эрх мэдэлтнүүдийн сэдээгүй сайхан ажлыг сэдэж, төрөх эмэгтэйчүүдийн сахиур байрлуулах хүлээлгийн танхим, жирэмсэн эхчүүдийн амарч тухлах танхимыг байгуулахаар санаа шулуудсан нь ийнхүү хэрэгжиж эхэлжээ.
Эхний ээлжинд Клиникийн нэгдүгээр амаржих газрыг сонгож авсан бөгөөд зураг төсөл, дизайн дээр нь “Хайс дизайн” компанийн хамт олонтой хамтарч байгаа бол хаалга, цонхны ажлыг хамтран хийх компаниа хайж байгаа юм билээ. Түүний энэ ажилд онлайнаар болон утсаар маш олон хүмүүс талархал илэрхийлж, сайн сайхныг хүсэн ерөөжээ. Ингээд та бүхэндээ түүний хэрэгжүүлж буй төслийн ажлын хэсгээс хүргэж байна.
www.URLAG.mn
