“Дэлхийн үнэт өв”-д бүртгэгдсэн хайр дурлалын бэлэг тэмдэг “Хажурахо” сүм

Энэ бол ЮНЕСКО-гийн “Дэлхийн үнэт өв”-д бүртгэгдсэн Энэтхэгийн төдийгүй дэлхий дахины хайр дурлалын бэлэг тэмдэг болсон “Хажурахо” сүм юм.

“The Khajuraho Group of Monuments” хэмээн нэрийддэг Энэтхэгийн уран барилгын хийцийн хамгийн гайхалтай жишээ болсон “Хажурахо” сүм нь Шинэ Делигээс 620 км алсад орших Мадъяа Прадеш мужийн Хажурахо тосгонд байдаг ажээ.

Сүмийн нэр нь “Дал модны нанжин чавгын хот” гэсэн утгатай ба МЭ IX – XI зуунд баригдсан бөгөөд 1830-аад оны үед Англичууд дахин сэргээн засварласан юм байна. Харин сүмийн архиктур шийдлийн хувьд ягаан болон шаргал элсэн чулуугаар баригдсан ба зарим багана нь 20 хүртэлх тн жинтэй байдаг гэнэ.

Орон орны жуулчдын олноороо зорин очдог Энэтхэгийн шашин ба урлаг соёлын эртний гайхамшигтай энэ газар маш олон хөшөө дурсгал байх агаад үүний олонхийг эр эмийн ёсон бүхий “эротик” баримлууд эзэлдэг гэнэ.

Эдгээрийн зарим нь адгуус амьтантай хурьцаж байгаа дүр зураг бүхий баримал ч байх агаад энэ нь Хинди шашины ёсоор бурханы олон дүр юм байна. Бурхан Кришна нь эр бодон гахай, могой, морь гэхчилэнгийн олон дүрээр газар дэлхий дээр ирж эмс охидыг жаргаадаг ба Хинди шашинд Бурхан ямар ч дүрээр ирсэн түүнийг байгаагаар нь хайрлах учиртай гэж үздэг тул ийнхүү адгуус амьтадтай хурьцаж байгаа дүрс бүхий баримлуудыг хийж өгсөн байдаг ажээ.

Сүмийн баримал дотроос хамгийн сонирхолтой нэгэн баримал байх ба энэ нь даяанч ламын үзэсгэлэнт бүсгүйтэй хурьцал үйлдэж байгаа дүр зураг юм. Хинди шашинд даяанч лам нь бясалгасаар Бурхнаас ч хүчтэй болох боломжтой гэж итгэдэг учраас ламыг Бурхнаас дээр гаргахгүйн тулд эмс хүүхнүүдийг илгээдэг байжээ. Энэ нь лам нарын сэтгэлийг хоёрдуулж, хүчийг сулруулах зорилготой ба хэрэв лам бүсгүйтэй хурьцах юм бол хүч, оюунаа алдах бол бүсгүйтэй хурьцахаас татгалзвал Бурхнаас ч хүчтэй дийлдэшгүй нэгэн болно гэж үздэг байсан байна.

Ер нь Энэтхэгийн сүм хийдүүдэд эр эмийн ёсонг өгүүлсэн олон баримал байдаг ба “Хажурахо” сүмийн ялгагдах онцлог нь эр эмийн ёсныг маш дэлгэрэнгүйгээр олон байрлалаар үзүүлсэнд оршдог ажээ.

www.URLAG.mn