“Их эзэн Чингис хааны мэндэлсний ой-Монгол бахархлын өдөр”-ийг тохиолдуулан “Монголын дүрслэх урлагт: Бурхан Халдун” сэдэвт мэргэжлийн уран бүтээлчдийн үзэсгэлэн, арга хэмжээг өнөөдрөөс энэ сарын 10-ныг хүртэл Занабазарын нэрэмжит Дүрслэх урлагийн музейд зохион дэлгэнэ.
Тус үзэсгэлэнд нийт 30 уран бүтээлчийн уран зураг, зураасан зураг, уран дархан, уран бичлэг зэрэг дүрслэх урлагийн төрлүүдээр өөр өөр уран сэтгэмж, дүр дүрслэл, өнгө аясаар бүтээсэн бүтээлүүдийг дэлгэхээс гадна “Бурхан Халдун” хайрхантай холбоотой бүхий л мэдээ, мэдээллийг хүргэх юм байна.
Онцлох зураачдаас дурдвал, Монгол Улсын Ардын зураач Г.Дунбүрээ, Урлагийн гавьяат зүтгэлтэн Д.Гунгаа, Монголын урчуудын эвлэлийн нэрэмжит шагналт С.Бадрал, С.Төгс-Оюун, З.Доржжанцан, Р.Ганхуяг, Х.Пүрэвжав, Х.Цэнгүнжав нар болон шилдэг залуу уран бүтээлчид оролцож байна.
Сонирхуулахад, Боржигоны өвөг Боданчар Мунхагийн үеэс тахиж, Чингис хааны үед Хамаг Монгол хийгээд Монголын их эзэнт гүрний сүлд уул хэмээн өргөмжлөн, түүнээс хойш хэдэн зуун жил үе улиран тахин шүтэж ирсэн Бурхан Халдун уулыг ЮНЕСКО-гийн дэлхийн өв хэмээн бүртгэсэн байдаг. 1818 оноос албан ёсоор тахиж байсан Бурхан Халдун уулын дархан цаазат байдлыг 1992 онд Улсын бага хурал болон Засгийн газрын тогтоолоор дахин баталгаажуулж, Хан Хэнтийн дархан цаазат газрыг байгуулжээ. 1995 онд Ерөнхийлөгч П.Очирбат, 2004 онд Ерөнхийлөгч Н.Багабанди, 2009 онд Ерөнхийлөгч Ц.Элбэгдорж нар тус тус зарлиг гарган, Бурхан Халдун уулыг “Төрийн тахилгат уул” хэмээн нэрлэж, уулын тэнгэрийг тайх төрийн ёслолыг 4 жилд нэг удаа үйлдэж байхаар тогтсоноос хойш 1998, 2002, 2006, 2010, 2015 онд тахилга үйлдсэн байна.
