Өнөө цагийн чадварлаг уран бүтээлчдийн нэг, тосон будгийн урлагт өөрийн өвөрмөц өнгө төрхийг бий болгосон зураач Х.Ууганбаярын “Үүлэн дээрх мөр” бие даасан үзэсгэлэн Монголын урчуудын эвлэлийн галерейд гарч байна.
Энэхүү үзэсгэлэнд зураачийн дотоод сэтгэлийн аялал, ертөнцийг үзэх үзэл, хүний оршихуйн мөн чанарыг тусгасан сүүлийн үеийн онцлох бүтээлүүд багтаажээ. Бясалгал, дотоод гэгээрэл, эрчим хүчний урсгал, орон зайн уялдаа холбоог харуулсан дүрслэл, амар амгалан, ертөнцийн зүй тогтол, бодит ба хийсвэрийн хослолыг түүний бүтээлээс харах боломжтой. Эл үзэсгэлэнд Буддын гүн ухааны өнгө аяс бүхий дүрслэлтэй 30 орчим бүтээл дэлгэжээ.
Эдгээр нь хүн төрөлхтний мөнхийн асуултууд болох “Би хэн бэ”, “Хаанаас ирсэн бэ”, “Хаашаа явж байна вэ” гэсэн эргэцүүлэл эрхгүй төрүүлнэ. Энд ирснээр та зөвхөн харах биш, мэдрэх, сэтгэх боломжтой юм.
“Үүлэн дээрх мөр” үзэсгэлэн ирэх сарын 3-ныг дуустал үргэлжилнэ.
