Монголын дүрслэх урлагийн ууган байгууллага болох Монголын урчуудын эвлэлээс зохион байгуулдаг “Монголын сайхан орон” уран бүтээлийн үзэсгэлэн үргэлжилж байна.
Жил бүрийн Үндэсний их баяр наадмын соёл, урлагийн хөтөлбөрийн салшгүй хэсэг болсон уг үзэсгэлэнд монгол орны байгаль, түүх соёл, үндэсний уламжлал, монгол хүний мөн чанар, дайчин сүр хүчийг илэрхийлсэн уран зургууд дэлгэгдэж, үзэгчдийн мэлмий, сэтгэлийг баясгаж байна.
Энэ удаагийн үзэсгэлэнд 100 гаруй уран бүтээлчийн 120 орчим бүтээл тавигдаж, дүрслэх урлагийн бүхий л төрлийг хамарсан, уран бүтээлчдийн шилдэг бүтээлүүдээр дамжуулан Монголын уран зургийн өв соёл, өнөөгийн чиг хандлага, зураачдын ур чадварыг олон нийтэд таниулж байна.
Үзэсгэлэнгийн нээлтэд Засгийн газрын хэрэгжүүлэгч агентлаг Соёл урлагийн газрын дарга Э.Цэнд-Аюуш, Монголын урчуудын эвлэлийн ерөнхийлөгч П.Ганбат, Монгол Улсын Төрийн соёрхолт, Ардын зураач Ш.Чимэддорж нар оролцож үг хэлсэн бол хүндэт зочид төлөөлөгчид хүрэлцэн ирж үзэсгэлэнг үзэж сонирхлоо.
Үзэсгэлэн нь монгол наадам үзэхээр ирсэн дотоод, гадаадын зочдод соёл, урлагийн гүн утга, үнэ цэнийг хүргэх зорилготой юм.
“Монголын сайхан орон” уран бүтээлийн үзэсгэлэн долдугаар сарын 24-нийг хүртэл Монголын урчуудын эвлэлийн “Арт” галерейд үргэлжилнэ.
