Япончууд өөрсдийн зохиосон ханз үсгээ Азийн орнуудад сурталчлан түгээн дэлгэрүүлэх зорилгоор анх 2005 онд БНХАУ-д Бээжингийн уран бүтээлчидтэй хамтарч ханз үсгийн үзэсгэлэн дэлгэж байсан түүхтэй аж.
Манай улсад 2017 онд уран бичлэгийн үзэсгэлэн дэлгэж байсан бол, хоёр дахь удаагаа Чингис хаан Үндэсний музейн “Мөнгөн мод” танхимд “Монгол, Японы ёс жудаг” уран бичвэрийн үзэсгэлэн дэлгэгдэж нээлтээ (2025.09.10) хийлээ.
Японы Элчин сайдын яам, “Шицүкэно кай-Ёс зүйн нийгмэлэг”-тэй хамтран хоёр улсын нэр хүндтэй улс төрчид, нийгмийн зүтгэлтнүүд, уран бичлэгийн уран бүтээлчдийг оролцуулсан тус үзэсгэлэн өнөөдрөөс эхлэн 10 хоногийн хугацаанд дэлгэгдэх бөгөөд, үзэгчдэд үнэ төлбөргүй үйлчилнэ.
Үзэсгэлэнгийн нээлтийн үеэр Япон Улсаас Монгол Улсад суугаа Онц бөгөөд Бүрэн эрхт Элчин сайд Игавахара Масар МУ-ын Ерөнхийлөгчийн зарлиг, Монгол хэлний тухай хуульд төрийн болон орон нутгийн өөрөө удирдах байгууллага энэ оноос эхлэн албан хэргээ кирилл, үндэсний хос бичгээр хөтлөн явуулна гэж заасны дагуу Засгийн газраас “Монгол бичгийн үндэсний хөтөлбөр III”-ийг батлан хэрэгжүүлж буй энэ цаг үед, мөн Япон Улсын Цог Жавхлант Эзэн Хаан, Эрхэм дээд Хатны хамтаар МУ-д төрийн айлчлал хэрэгжүүлсний дараа энэхүү үзэсгэлэнг зохион байгуулж буйгаараа онлог. Хоёр улсын “Хүн төвтэй” “Энх тайван, хөгжил цэцэглэлтийн төлөөх Тусгай стратегийн түншлэл”-ийн харилцаа түүний дотор иргэд хоорондын итгэлцлийн бэхжүүлэх, соёлын харилцааг өргөжүүлэн хөгжүүлэхэд түүхэн ач холбогдолтой”-г онцоллоо.
