“Чингис хаан” үндэсний музейн есдүгээр давхрын тусгай үзүүллэгийн танхимд “Монгол ном бичгийн соёл” сэдэвт цуглуулагч Р.Отгонбаатарын үзэсгэлэн дэлгэгдэж /2025.09.17/ олон нийтийн хүтээл болж эхэллээ.
Энэхүү үзэсгэлэн нь хувь хуний хагас зуу орчим жилийн туршид өөрийн боломжит хэмжээгээр цуглуулсан зүйлс боловч малчин монголчуудын 1000-аад жилийн бичиг номын үлгэр жишээ түүнд холбогдох эд өлгийн биет дурсгалыг хойч үедээ уламжлан танилцуулах сайхан өв болж буйгаараа онцлог юм.
Үзэсгэлэнд Монгол бичиг үсгийн түүхэн төлөвийг товч үзүүлж, гол төлөв монгол зурагт ном судрын жишээг зонхилон дэлгэж байна.Тодруулбал, монгол зурагт модон барын ном хэвлэлийн хэсгийг онцолж, бар дармал зурагт номуудын гар зурмал, бичмэл хувилбарыг ч харьцуулан ажиглахад зориулж хэд хэдэн номын хэсгээс жишээлэн үзүүлжээ.
Цуглуулагч Р.Отгонбаатар нь мэргэжил мэдлэг, дур сонирхлынхоо дагуу Монгол бичгийн хэрэгсэл, Монгол ховор ном судрын нэлээд баян үнэт өвүүдийг оюутан ахуйгаасаа цуглуулсаар эх орондоо олон удаа тусгаар үзэсгэлэнгээ гаргаж монгол өв, соёлоо сурталчлахын зэрэгцээ ОХУ, БНПУ, Франц, Румын зэрэг улс орнуудад цуглуулгынхаа үзэсгэлэнг дэлгэж байв.
Тус үзэсгэлэнгийн нээлтийн үеэр Хэл бичгийн ухааны доктор Х.Лувсанбалданы мэндэлсний 100 жил, Хэл зохиолын хүрээлэнгийн хүндэт доктор Р.Отгонбаатарын 70 насны ойд зориулсан “Хэл зохиол судлал 2025” ОУ-ын эрдэм шинжилгээний хурлыг зохион байгуулж байна.
Үзэсгэлэн есдүгээр сарын 27 хүртэл үргэлжилнэ.
