МУЭ-ийн гишүүн зураач Д.Тайванжаргал бие даасан дөрөв дэх үзэсгэлэнгээ “Үзэсгэлэнт 4 улирал” нэртэйгээр Г.Занабазарын нэрэмжит Дүрслэх урлагийн музейд өчигдөр /2025.10.07/ нээлээ.
Уран бүтээлч монгол болон гадаад орны үзэсгэлэнт байгаль, өвөрмөц тогтоц, байгалийн гоо үзэсгэлэн, аж байдал, хотжилтын сэдвээр төрмөл мэдрэмж, бодит сэтгэлгээ, өөрийн өнгө аяс, арга барил, оюун ухаанаараа обьектив байдлаар, дүрслэн урлахын яруу сайхан бичилт, илэрхийллээр дүрсэлжээ.
Энэхүү үзэсгэлэнд дотоод болон гадаадад хийсэн судалбар зургийг багтаасан 90 гаруй бүтээлийг дэлгэж байна.
МУЭ-ийн гишүүн зураач Д.Тайванжаргал ярихдаа “Дотоод судалбарт Богдын ордон, Чойжин ламын сүм “Зонховын дуган” зэрэг онцлох бүтээл орсон. Харин гадаад судалбарт БНХАУ-ын Шиамэнь хотод сар гаруй хугацаанд туурвисан бүтээлүүд багтсан. Байгаль бол бидний багш. Байгаль өөрөө амьд, сүнслэг оршихуй. Тэр бүхнээс би өнгө аясаа олж, зүрх сэтгэлээсээ зурсан бүтээлээ хүмүүст хүргэхийг зорьдог. Монголчууд бид эх орныхоо байгальд дуртай, түүгээрээ бахархдаг ард түмэн. Би ч мөн энэ сэдвийг дагнан 30 гаруй жил уран бүтээлээ туурвисаар байна” гэв.
Ташрамд дурдахад, “Үзэсгэлэнт 4 улирал” хэмээсэн нь “Монголын дөрвөн улирал өөрөө гайхалтай үзэсгэлэнтэй. Улирал бүр өөрийн өнгө, аяс, сэтгэл татам төрхтэй байдаг учир ийнхүү нэрлэжээ.
Тус үзэсгэлэн энэ сарын 13-ныг хүртэл үргэлжлэх ажээ. “Үзэсгэлэнт 4 улирал” үзэсгэлэнгийн зургуудаас сонирхуулж байна.
