ОХУ-ын Успенскийн цогчин дугана болон Патриархийн ордны их танхимд 2026 оны гуравдугаар сарын 20-ны өдөр “Чингис хааны хойч үе ба Орос” нэртэй үзэсгэлэн нээхээр төлөвлөж байгаа ажээ. Энэ үзэсгэлэнд Оросын болон дэлхийн түүхийг нээж харуулах гэнэ.
ОХУ тус үзэсгэлэнгээр дэлхий дахинд Чингис хааны үр удам XV-XVII зууны үеийн Оросын төр бүтэж бүрэлдэх болон бэхжихэд оролцсон түүх, тэдний нөлөө, хувь нэмэр, судалгааны түүхийг танилцуулахыг зорьж байна. Москва хот дахь Кремлийн хэвлэл мэдээллийн албанаас энэхүү үзэсгэлэнгийн үйл явдлын бэлтгэл ажлын талаарх мэдээллийг танилцуулжээ. Үзэсгэлэнгийн зохион байгуулагчид уг цуглуулгыг дэлхийн түүхийн үйл явцуудыг гүнзгий ойлгоход чухал ач холбогдолтой гэж онцолсон байна.
Кремлийн их танхимд 150 гаруй үзмэрийг дэлгэн танилцуулах бөгөөд Монгол Улс төдийгүй, дэлхий дахинаас нэр хүндтэй музей, архивууд, тухайлбал ОХУ-ын “Эрмитаж”, ОХУ-ын Түүхийн төв музей, Оросын музей, мөн Ш. Маржаний нэрэмжит судалгаа, соёлын хөтөлбөрүүдийг дэмжих сан зэрэг томоохон байгууллагууд уг үзмэрүүдийг дэлгэх юм. Мөн томоохон номын сангууд болон хувийн цуглуулгууд энэхүү төслийн нэг хэсгийг бүрдүүлсэн аж.
