Казахстаны нийслэл Астана хотод Евроазийн номын үзэсгэлэн болж өндөрлөлөө.
Энэхүү номын үзэсгэлэнд 10 орчим орны номын зохиогч, хэвлэн нийтлэгчид оролцсон байна. Харин манай улсыг төлөөлөн “Либро Сувд” утга зохиолын агентлаг тогтмол оролцдог бөгөөд тус агентлагийнхан зөвхөн төлөөлж буй зохиолч, хэвлэн нийтлэгчдийнхээ ном бүтээлийг танилцуулахаас гадна Монгол Улсын нийслэл Улаанбаатар хотын Д.Сүхбаатарын талбайд зохион байгуулах “Номын баяр”-ынхаа мэдээллийг хүргэн ажиллажээ. Үзэсгэлэнгийн үеэр Монголын орчин цагийн 100 гаруй яруу найрагчийн 500 гаруй шүлэг, яруу найргийг багтаасан “Монголын яруу найргийн цомог” бүтээлийг зохиолч, яруу найрагч Х.Байыт казах хэлнээ орчуулан, “Фолиант” хэвлэлийн газраас эрхлэн гаргаж уншигчдад өргөн барив.
Түүнчлэн Соёлын гавьяат зүтгэлтэн, зохиолч Г.Аюурзанын “Тэнгэрийн судар” бүтээлийг яруу найрагч Р.Сураган казах хэлнээ орчуулж, мөн “Фолиант” хэвлэлийн газраас эрхлэн гаргаснаар албан ёсоор Казахстаны уншигчдын хүртээл болгожээ. Тэрбээр Астана хот дахь ЭСЯ-ны байранд оюутнууд, дипломат ажилтнууд тэдний гэр бүлд өөрийн уран бүтээлийн тухай танилцуулах уулзалт зохион байгуулсан байна. Энэ үеэр Монголын зохиолчдыг Абайн нэрэмжит олон улсын яруу найргийн академийн тэргүүн Үлүгбэх Эсдаулет нэрэмжит шагналаар шагнажээ.
