“Шинэ үе”-ээс түр чөлөө авч, кино хийж, эмнэлгүүдийн хүлээлгийн танхим тохижуулах ажил хийж яваа жүжигчин Г.Ундармаа ээлжит уран бүтээлээ дуусгаад байгаа ажээ. “Single ladies” уран сайхны киногоороо чамгүй амжилт олсон “U-Film” энэ удаад дахиад л эмэгтэй хүний тухай сэдвийг барьж авсан гэнэ. Тодруулбал, ямар эмэгтэй хамгийн аз жаргалтай байдаг вэ гэдгийг харуулахыг хичээсэн ажээ.
Чухам яагаад эмэгтэй хүний сэдэв сонгож авсан тухайгаа жүжигчин Г.Ундармаа “Би охин, хүүхэн, бүсгүй, эмэгтэй, эхнэр хэмээн нэрлэгдсэн эмэгтэй хүн. Хэдэн жилийн дараа эмээ гэж бас нэрлэгдэнэ. Эмэгтэй хүний сэтгэлийг, эмэгтэйчүүдийнхээ хүсэл мөрөөдлийг, тэднийхээ амьдралыг ямар ч эрдэм номноос илүүтэйгээр мэдэх учраас уран бүтээлийнхээ сэдвийг эмэгтэйчүүдээр сонгож аваад байгаа юм” хэмээн ярьжээ.
Тэрбээр шинэ бүтээлийнхээ найруулагчаар нь ажилласан бөгөөд өөрөө ямар нэг дүрд тоглоогүй аж. Киноны зураг авалт аль хэдийнэ дуусч, дуу оруулалт, хөгжим гээд бусад ажлуудаа хийж байгаа юм байна. Харин ямар жүжигчид тоглосон болоод киноны нэрийг нууцалж байгаа аж. Гэхдээ тун удахгүй дэлгэрэнгүй мэдээллийг өгч, сурталчилгаагаа цацах юм байна. Харин киноны нээлт ирэх оны нэгдүгээр сард болох ажээ.
Н.Пунцагболд
