БНХАУ-ын Манжуурын 11 дэх удаагийн Хятад, Орос, Монгол олон улсын гоо бүсгүй шалгаруулах тэмцээн амжилттай болж өндөрлөлөө. Энэ сарын 24-нд буюу өчигдөр тэмцээний эцсийн шатны шалгаруулалт болж, эх орноо төлөөлөн оролцсон Н.Ану тэргүүн байр эзэллээ. Н.Анугийн хувьд тэмцээний бүхий л өдрүүдэд бусад оролцогчдоос илт давуу байсан юм.
БНХАУ-ын Өвөрмонголын өөртөө засах орны Хөлөнбуйр аймгийн Манжуур хотноо зохион байгуулагдсан энэхүү олон улсын тэмцээнд ОХУ, БНХАУ болон Монгол улсын нийт 58 гоо бүсгүй оролцож, арав гаруй хоногийн турш гоо үзэсгэлэн, авъяас чадвар, оюун ухаанаараа өрсөлдсөн юм.
Тэмцээний шилдэг аравт манай улсын гоо бүсгүй Уярал, Намуунаа нар шалгарсан бол гуравдугаар байрт Монголын гоо бүсгүй Алтанзул, А.Сайхантамир нар шалгарлаа. Мөн шүүгчид гуравдугаар байрт шалгарсан Алтанзулыг хамгийн гоё биетэй миссээр, А.Сайхантамирыг шилдэг үндэсний хувцастай миссээр өргөмжилсөн юм. Харин тэмцээний хоёрдугаарт байрт ОХУ болон БНХАУ-ын хоёр гоо бүсгүйг шалгарууллаа. Манай улсаас энэхүү тэмцээнд 15 гоо бүсгүй оролцсон бөгөөд хоёр дахь өдрийн шалгаруулалтад оноолтоор нь жагсаан тэдний тавыг нь хасаад байсан билээ.
Хятад, Орос, Монгол олон улсын гоо бүсгүй шалгаруулах тэмцээнд манай улсын гоо бүсгүйчүүд жил бүр оролцдог бөгөөд ийнхүү тав дахь удаагаа түрүүлээд байна.
Ц.Сонор
