Дуучин Э.Болор-Уянга хоёр жилийн өмнө дуучин Д.Эрдэнэцэцэг агсны дурсгалыг хүндэтгэн “Учралын эгшиг”, “Намуун байгаль”, “Чамайгаа оллоо”, “Зүрхэн чулуу” зэрэг бүтээлүүдийг багтаасан “Дуулъя дурсъя” нэртэй цомгоо хөгжим сонирхогчдод хүргэж байсан. Тэгвэл залуу уран бүтээлч бүсгүй тун удахгүй өөрийн бие даасан тоглолтоо хийх гэж байна. Тоглолт энэ сарын 30-ны өдөр “River sound” клубт "Учралын эгшиг" нэртэйгээр болох юм.
Дуучин бүсгүйн уран бүтээлийн талаар “Пентатоник” академийн ерөнхийлөгч, Урлагийн гавьяат зүтгэлтэн Б.Долгион ийн ярилаа.
-Таныг Э.Болор-Уянга дуучны уран бүтээлийн хамтрагч гэж хэлж болно. Дуучин маань удахгүй “Учралын эгшиг” тоглолтоо хийх гэж байна. Та бидэнд сэтгэгдлээсээ хуваалцахгүй юу?
-Э.Болор-Уянга дуучин бол Монголын эмэгтэй дуучдын эгнээнд аль хэдийнэ багтчихсан туршлагатай дуучдын нэг юм. Өөрийн гэсэн өнгө аястай дуучин. Миний хувьд хамтарч ажилласан дуунууд бий. Дууг маш түргэн бодож, ойлгож хүнд хүртэл амилуулж чаддаг. Уянгын дууг ч, рок талын дууг ч дуулахад төвөггүй дуулдаг. Цомгоо сонсогч фэнүүддээ хүргэснийг нь мэднэ. Манай сайн дуучдын нэг яахын аргагүй мөн. Анх бид хоёр уран бүтээлээр учирсан. Одоо ч уран бүтээл дээр хамтарч ажилласаар байгаа. Э.Болор-Уянга Д.Эрдэнэцэцэгийг шүтдэг бодол санаандаа хөтлөгддөг уран бүтээлч. Тэр сайхан дуучны уянгалаг сайхан дуу хуурыг үргэлжлүүлэн ард түмэнд хүргэж байгаад нь их баярлаж явдаг.
-Дуучин бүрт өөрийн гэсэн онцлог байдаг гэх. Тэгвэл дуучин Э.Болор-Уянгын онцлог нь юу юм бол?
-Энэ дуучны хувьд сонсогчдын сонирхлыг ихээхэн татсан хүн л дээ.Өөрийн бие даасан уран бүтээлээ маш чадварлаг, сайн бүтээж байгааг нь би мэднэ. Дуучин Б.Сарантуяатай хамтарч амьд хөгжимтэй дуулдаг. Энэ тал дээр нэлээд туршлага хуримтлуулж байгаа байх. Энэ нь их сайн хэрэг. Дуучны сүүлийн үеийнуран бүтээлүүдийг нь ажиглахад шинэлэг хэв маяг ихтэй. Мөн дууны үг, ая дан нь маш өвөрмөцболсон нь ажиглагддаг. Удахгүй болох"Учралын эгшиг” тоглолтондоо хуучин дуунуудаас гадна шинэ бүтээлүүд эгшиглэх юм билээ. Энэ нь бас нэг онцлог юм. Э.Болор-Уянга дуучин шүтэн бишрэгчиддээ шинэ бэлэг барьж тоглолт зохион байгуулах гэж байгаад нь талархаж байна. Дуучин дүүдээ уран бүтээлийн өндөр амжилт хүсье.
-Та “Учирлын эгшиг” тоглолтыг үзэх үү?
-Үзэлгүй яах вэ. Э.Болор-Уянга дуучныг дэмждэгийн хувьд уран бүтээлийнх нь тоглолтыг үзнэ.
-Та хоёрын хамтын бүтээл ер нь хэд байдаг юм бэ?
-Миний хоёр дууг дуучин Э.Болор-Уянга амилуулсан. Надад бас бодсон зүйл бий. Удахгүй гэнэтийн бэлэг барина.Би ер нь рок попынтогооноос урган гарч буй бүх хүнийг дэмжинэ гэж боддог. Бидний дундаас өөрийн гэсэн өнгө төрхтэй дуучин гарч ирж байгаа нь урлагийн хүрээ тэлж, улам чанаржиж байгаагийн нэг илрэл.
-Дуучныхаа цаашдын уран бүтээлд юуг захиж хэлэх вэ?
-Ерөнхийдөө энэ дуучин бүсгүй урлагт ороод багагүй хугацаа өнгөрсөн. Үргэлж өөрийгөө боловсруулж, шинийг эрэлхийлэгч чанар нь олон сайхан зүйлд хүргэнэ. Цаашдаа ч олон чанартай бүтээл хийх ирээдүйтэй дуучин гэж би үнэлдэг. Урлагийн их амжилт хүсье.
-Баярлалаа. Танд амжилт хүсье
www.Urlag.mn
