“Та зүрхэнд мөнх Тэв тэнүүн нутаг минь
Тэртээ алсад хөхрөх
Тэгш дүүрэн тэнгэр минь
Тэнгэр минь
Та харцанд мөнх
Цэв цэнхэр нутаг минь
Цээжний гуниг арчих
Цэвэр ялдам салхин минь
Салхин минь…”гэсэн сэтгэлд хүрсэн сайхан үгтэй дуу монголчуудын дуулах дуртай, сонсохыг хүсдэг уран бүтээлийн нэг юм. Энэхүү дуу бүтсэнээс хойш хамтлаг, дуучид өөр өөрийн өнгө аясаар үзэгчдийн сонорт хүргэсээр ирсэн. Тэр дундаас поп опера урсгалаар уран бүтээл туурвидаг “Увертюра” хамтлагийнхан дууныхаа клипийг шүүмжлэлт өнгө аястай бүтээсэн нь дууг хориглоход хүрчээ. Урлагийн гавьяат зүтгэлтэн Б.Шаравын “Сэтгэлийн эгшиг” аялгуунд яруу найрагч Л.Өлзийтөгс шүлгийг нь бичиж “Увертюра” хамтлагийнхны “Өнө мөнх орон” дуу бүтсэн түүхтэй. Энэ талаар тус хамтлагийн дуучин Г.Пүрэвдагватай цөөн хором ярилцлаа.
-Танай хамтлагийн дуулсан “Өнө мөнх орон” дууг цацахыг хаанаас хориглосон юм бэ?
-Энэ талаар яривал урт түүх болно. Ер нь бол энэ дуу таван жилийн өмнө гарсан. Хүмүүс манай дууны клипэд ямар үйл явдал гардгийг мэднэ. Тодруулбал хоёр сайд гарсны дараагаар клипний талаар хурцаар ярьж эхэлсэн. Хэсэг хугацааны дараагаас телевизийнхэн “Өнө мөнх орон” дууг өөрсдөө цацахаа больсон.
-Яагаад цацахаа больж байгаа талаар та нарт мэдэгдсэн үү?
-Мэдэгдэлгүй яах вэ. Хүмүүс яриад “Танай клипийг гаргахгүй” гэсэн.
-Клипийн зохиолыг хэн бичсэн юм бэ?
-“Милл” кино компанийн найруулагч Сүхээ бичсэн.
-Клипийг тохиолдлоор хийсэн юм уу, эсвэл анхнаасаа тийм сэдвээр хийхээр төлөвлөсөн үү?
-Анхнаасаа л тэгж хийнэ гэж найруулагчид зохиолоо өөрсдөө гаргасан юм билээ.
-Хамтлагийн сайн уран бүтээлийн нэгийг цацахаа больсон нь та нарт харамсалтай байсан байх?
-Клипийг цацахаа больсон нь оносон. Энэ дууг дуулснаас хойш зургаан жилийн дараа надаас “Өнө мөнх орон дууг яагаад дуулахгүй байгаа юм бэ” гэж асууж байна. Муу дуу байсан бол хүмүүс санахгүй. Харин сайн уран бүтээл байсан учраас одоо ч гэсэн хүмүүс сураглаж, үгүйлж байна шүү дээ.
-Та бүгдийг “Морин хуур-2014” наадамд оролцож байгаа гэсэн. Хэний уран бүтээлээр оролцож байгаа вэ?
-Урлагийн гавьяат зүтгэлтэн Л.Насанбатын аялгуу, С.Эрдэнийн шүлэг “Манан” дуугаар оролцож байна.
-Ойрд уран бүтээлийн олз омог ихтэй байна уу?
-Бид хамгийн сүүлд “Манан” дууг дууллаа. Харин одоо шинэ уран бүтээл дээр ажиллаж байна.
Эх сурвалж: Unen.mn
