МУЭ-ийн үзэсгэлэнгийн танхимд барималч, керамикч Ж.Цолмонхүүгийн уран бүтээлийн бие даасан үзэсгэлэн маргааш буюу наймдугаар сарын 1-нд нээлтээ хийх гэж байна.
Ж.Цолмонхүү нь 1959 онд төрсөн. Дүрслэх урлагийн дунд, дээд сургуулийг чимэглэх зураач, барималч мэргэжлээр төгссөн байна. Ж.Цолмонхүү нь дүрслэх урлагийн томоохон төрөл болох керамикийн урлагийг хөгжүүлэхэд өв уламжлалаасаа байнга суралцан ямагт шинийг санаачилж, Монголынхоо ардын гар урлалыг орчин үед дэвшүүлэн хөгжүүлэх талаар дорвитой бүтээл хийдэг манай авъяаслаг, шилдэг уран бүтээлчийн нэг.
Тэрбээр 1979 оноос уран бүтээлийн гараагаа эхэлж өөрийн оронд болон Орос, Болгар, Хятад, Унгар, Герман, Япон зэрэг орнуудад зохион байгуулагдсан үзэсгэлэнгүүд, олон улсын хэмжээнд зохиогддог уран сайхны керамикийн фестиваль, триенналь, симпозиумд өөрийн уран бүтээлээрээ шалгарч амжилттай оролцож иржээ.
2003 онд Улаанбаатар хотод бие даасан үзэсгэлэнгээ гаргасан Ж.Цолмонхүү нь олон улсын хамтарсан үзэсгэлэнд “Морьтон”, ”Сав”, ”Ногоон чоно” бүтээлүүдээр оролцож, оны шилдэг уран бүтээлийн үзэсгэлэнд “Эх хатан”, “Домог” бүтээлүүд нь шалгарч оролцсон байдаг.
2004 онд Хүрээ дөрвөн уулын оргилд эзэн савдгуудыг боржин чулуугаар 90×100см хэмжээтэй хийж залан, “Намар” үзэсгэлэнд “Үлэг эх” баримал нь тавигджээ. Мөн 2005 онд Япон улсад зохиогдсон уран сайхны керамикийн фестивальд амжилттай оролцсон бол 2006 онд “ЮНЕСКО” –гийн Азийн гар урлалын чанарын батламжит бүтээлийн шагналыг хүртсэн байна.
