“Харанга” хамтлагийн гоцлол дуучин, СТА Х.Лхагвасүрэнгийн “Морин хуур, Толин хул” хэмээх бие даасан тоглолт өнгөрсөн амралтын өдрүүдэд Соёлын төв өргөөнд болж өнгөрлөө.Түүний тоглолт фэнүүдэд нь маш их таалагдсан бололтой. Үзэгчид танхимаас гарч явахдаа өөр хоорондоо “Лхагваад Монгол Улсын гавьяат жүжигчин цол олгох цаг болчихож” хэмээн ярьж байв.“Морин хуур, Толин хул” тоглолтыг үзсэн УИХ-ын дарга З.Энхболд “Twitter” хуудсандаа “Лхагваа зөвхөн “Толин хул”-аараа гэхэд л гавьяат авах ёстой. Гэтэл цаана нь арван гавьяатын зиндааны сайхан дуунуудтай” гэжээ.
Х.Лхагвасүрэн энэ сарын 11-нд Үндэсний их баяр наадмын нээлтийн үеэр Төв цэнгэлдэхэд морьтой орж ирж “Толин хул” дуугаараа үзэгчдийг баясгасан. Энэ нь баяр наадмын нээлтийн арга хэмжээний нэгэн чимэг байсан гэлтэй.Хар тамхи хэрэглэсэн, худалдаалсан хэргээр 2008 онд шүүхээс долоон жилийн ял сонссон тэрбээр жил орчим хугацааг төмөр торны цаана өнгөрүүлснээр тухайн үеийн Ерөнхийлөгч Н.Энхбаяр зарлиг гарган түүнд өршөөл үзүүлсэн юм.Х.Лхагвасүрэн үүнээс хойш уран бүтээлдээ онцгой анхаарч гаргасан дуунууд нь хит болж чадсан билээ. Сайн муу хосолсон ч ард түмний хайр хүндэтгэлийг хүлээсэн түүнд гавьяат цол олгох цаг нь болчихсон гэдэгтээ маргах хүн цөөн бололтой.
Эх сурвалж: www.TIME.mn
Т.Арьяа
